Als Referänz a üsi SchwizerläserInne, e ned grad wort-wörtlechi Übersetzig i Mundart: Juckreizalarm

in

Wie immer zum Johresändi schlüsse mer üsi Site solang, bis die drü Herre usem Morgeland wieder vom Acker sind. Schpöteschtens am 7. Jänner gohts wie gwohnt witer. Falls überraschendi Ereignis iträffed, wo’s wärt wäred, drüber z’brichte, würdet mer üs au zwüschedure mälde. Me weiss jo nie, was chunnt. Do no e Neuigkeit, wo’s verdient hed, verbreitet z’wärde:

S‘ehemalige Centrotherm-Gebäude wird bald umbaut, demit sich die ganz Wichtige us de ganze Wält, schpöteschtens ab 2016 det chönnd s’Pfötli schüttle. Isch dä Glaschübel denn suber zwäg gmacht, wird er samt Chaufpris mindeschtens 18 Millione Euro verschlunge ha. Zur Zyt wird nochmene passende Name gsuecht. Über hundert seemoz-LäserInne händ sich beteiliged und üs ihri Vorschläg igreicht. Under anderem: SAS (Schrott am Seerhein), KWP (Konstanzer Wahnprojekt), oder EGK (Eurograb Konstanz). Ganz knapp vorne liet allerdings e Vorschlag, wo au üse Favorit isch: GRUB (Gedächtnisruine Uli Burchardt). Will momentan no kei Schufle gschwunge wird a däm heisse Ort, lö mer üs mit dere Entscheidig no Zyt bis Ändi Jänner und hoffed uf neui, pfiffegi Ideä.

Im Zämehang mit däm viel diskutierte Kulturtämpel mehred sich die skeptische Stimme sogar usem bürgerliche Lager. Die hend sich bis vor churzem no sehr euphorisch zeigt. Mit es bizzeli Bisse heds agfange. Langsam aber sicher verursacht das Thema en heftige, konstante Juckreiz, wo sich bis zumene nässende Ekzem cha uswachse. E stockkonservative Rotsherr, wo sin Name under gar kene Umständ uf dere Site möcht läse, rett i däm Zämehang sid einiger Zyt nume no vo Centrodermitis. Bravo, mer finde das isch s’Wort vom Johr 2015.

Im Mai darf seemoz sin achte Geburtstag fire. Dass das so isch, verdanke mer üsne treue LäserInne, Azeigechund(e)Inne und SpänderInne. Do defür a alli e ganz härzliche Dank! Sälbverschtändlich freue mer üs, wenn witerhin sich es paar Euro uf üses Spändekonto verirre (es döfed au Fränkli si) und mithälfed, die Medielandschaft z’demokratisiere.Mer händ üs als Spändeaktion überleit gha, als Stärnsinger düre Landchreis z’zieh.Noch es paar Singprobe und rieflicher Überlegig si mer zum Schluss cho, dass mir das üs und üsne LäserInne sötted erschpare und hoffed, dass s’gschriebne Wort länged als Gägeleischtig für ne grosszügegi Schpänd.

I däm Sinn wünsche mer euch es paar ruigi Täg und für’s 2015 nur s’Allerbeschti.